حرف الالف
احب اعيش
أحـب اعيش ولـو أعيش فـى الغابـات
أصـحى كمـا ولـدتـنى أمـى وابـات
طـائر . . حوان . . حشرة . . بشر . . بس اعيش
محـلا الحيـاة . . حتى فى هيئـة نبـات
عـجبى !!
أحسـن مـا فيهـا العشـق
أحسـن مـا فيهـا العشـق والمعشـقة
وشـويتين الضـحــك والتـريقـة
شـفت الحيـاة، لفيـت، لقيـت الألـذ
تغييـرهـا، وده يعنـى التعب والشـقا
عـجبى !!
إخطـفنى ياللى تحـبنى
إخطـفنى ياللى تحـبنى ع الحصـان
الدنيا قالت يــوم فى مـاضى الزمان
إخطـفنى ياللى تحبنــى ع الفـرس
الدنيا قالت . . قم خطـفها الشــيطان
عـجبى !!
الأرض شـوك
الأرض شـوك أيـوه لكـين هايش
والحمـرة مش يعنى الطريق حايش
دى دمنـا السـيال . وبشـرة خير
ان انتى عايشـه . وان أنا عايش
عـجبى !!
أعـرف عيـون هى الجمـال
أعـرف عيـون هى الجمـال والحسـن
واعـرف عيـون تـاخد القـلوب بالحضن
وعيون مخيفة وقـاسـية وعيـون كتيـر
وبـاحس فيهـم كـلهـم بـالحــزن
عـجبى !!
إقلـع غمـاك يـا تـور
إقلـع غمـاك يـا تـور وارفض تلـف
إكسـر تـروس السـاقيـة واشـتم وتف
قال : بس خطوة كمان . . وخطوة كمان . .
يا اوصـل نهـاية السـكة يا البير يجف
عـجبى !!
أنا شـاب
أنا شـاب لـكن عمـرى ولا ألف عـام
وحيـد ولـكن بين ضـلوعـى زحـام
خـايف ولـكن خـوفـى مـنى أنـا
أخـرس ولـكن قـلبـى مـليـان كـلام
عـجبى !!
أنا كـل يـوم أسـمع
أنا كـل يـوم أسـمع . . فلان عذبوه
أسـرح فـى بغـداد والجزاير واتوه
مـا اعجبش م اللى يطيق بجسمه العـذاب
واعـجـب مـن اللى يـطـيق يعذب أخوه
عـجبى !!
أنا قـلبى كان شخشيخة
أنا قـلبى كان شخشيخة أصـبح جـرس
جلجلت بـه صـحيوا الخـدم والحـرس
أنـا المـهرج . . قمتو ليـه خفتو ليـه
لاف إيدى سـيف ولا تحت مـنى فـرس
عـجبى !!
انـا الذى عشـت الزمن
انـا الذى عشـت الزمن مضـيعة
بـروح حـزينة معـفنة مضعضعه
زرعت شـجرة سـنط لجل انجرح
لقيتهـا شـعر البنت ومفـرعـه
عـجبى !!
انا الذى عمـرى اشـتياق
انا الذى عمـرى اشـتياق فى اشـتياق
وقطـر داخـل فـى محطـة فــراق
قصـدت نبـع السـم وشـربت سـم
مـن كتر شـوقى وعشـمى فى الترياق
عـجبى !!
أنا اللى بالأمـر
أنا اللى بالأمــر المحــال اغتـوى
شـفت القمـر نطـيت لفوق فى الهوا
طـلته مـا طـلتوش إيه انـا يهمنـى
وليـه … ما دام بالنشـوة قلبـى ارتوى
عـجبى !!
أنـا إلـه الـوجــد
أنـا إلـه الـوجــد رب الـهيــام
أضـرب بسـهم الوهـم وهــم الغـرام
وهــم الغــرام مـن كتر مـا هو لذيذ
رشـقت انـا ف صـدرى جمـيع السـهام
عـجبى !!
أنا قلبـى كـورة
أنا قلبـى كـورة . . والفـراودة أكـم
يـامـا اتنطـح وانشـاط .. وياما اتعكم
واقـول له كـل ح ينتهى فى المعـاد
يقـول بسـاعتك ؟ والا سـاعة الحكم ؟
عـجبى !!
أنا قلبى كـوكب
أنا قلبى كـوكب وانطلق فى المـدار
حواليـكى يا محـبوبتى يا نور ونار
يلف مـهمـا يـلف مـابيكـتفيش
وتمـللى نصـه ليل ونصـه نـهار
عـجبى !!
أنا قلت كلمـة
أنا قلت كلمـة وكان لهـا مـعنيين
كمـا بطـن واحـده وتـوأمين زيـن
وشـينلو دنيا شـر . . التوأم الخير يموت
لو دنيا خير . . الشـر ح يعيش مـنين ؟
عـجبى !!
أنا كانلـى أب
أنا كانلـى أب . وكـان رئيس محكمة
سـتين سـنة . فى قضية واحدة اترمى
سـتين سـنة وطـلع بـراءة وخـرج
يشـكى الحياة والمـوت لـرب السـما
عـجبى !!
أنـا كنت شـىء
أنـا كنت شـىء وصـبحت شىء ثم شىء
شـوف ربـنـا . . قـادر علـى كـل شىء
هـز الشـجر شـواشيـه ووشـوشنى قال :
لابد مـا يمـوت شـىء عشـان يحيا شىء
عـجبى !!
إنسـان
إنسـان أيـا إنسـان مـا أجـهـلك
مـا أتفهـك فى الكـون ومـا أضـألـك
شمس وقـمـر وسـدوم ومـلايين نجـوم
وفـاكرهـا يـا مـوهـوم مخلوقـه لـك ؟
عـجبى !!
إنشـد يـا قلبـى
إنشـد يـا قلبـى غنــوتك للجـمـال
وارقص فى صـدرى من اليمين للشـمال
مـا هـوش بعيـد تفضـل لبكره سـعيد
ده كـل يـوم فيـه ألف ألف احتمـال
عـجبى !!
آه لـو أنا ومحبـوبى
آه لـو أنا ومحبـوبى جـزنا الفضـى
فـى سـفينة وحـدينا . . وأشـيا رضا
سـاعة صـفا تعجبنـا نرجـع لـهـا
والهـم قبـل ما ييجى … يبقى مضى
عـجبى !!
أهوى الهـوى
أهوى الهـوى وهمس الهوى فى العيـون
وبسـمة المغـرم . ودمـعـه الحنــون
وزلــزلات الحــب نهــد الصــبا
اكـون أنـا المــحبوب . أو لا أكـون
عـجبى !!
أوصـيك يا إبنـى
أوصـيك يا إبنـى بالقمــر والزهـور
أوصـيلك بـليل القاهـرة المســحور
وإن جـيت فى بالك .. إشـترى عقـد فل
لأى سـمرا … وقبـرى إوعـك تـزور
عـجبى !!
اوقـات
اوقـات افـوق ويحــل عنـى غبـايا
واشـعر كأنى فـهمت كـل الخبـايـا
وافتـح شـفايفى عشــان أقـول الدرر
مـا أقـولش غير حبة غزل فى الصبايا
عـجبى !!
إيـديا فـى جيوبـى
إيـديا فـى جيوبـى وقلبـى طـرب
سـارح فى غربة بس مش مـغترب
وحـدى لكـين ونسـان وماشـى كده
وبـابتعد … ما اعرفش … أو باقترب
عـجبى !!
إيش تـطلبى يـا نفسـى
إ
يش تـطلبى يـا نفسـى فـوق كـل ده
حظــك بيضــحك وانـتى متنكـدة
ردت قـالت لـى النفس : قـول للبشـر
مـا يبصـوليش بعيـون حـزينـة كـده
عـجبى !!
إيه اللى خدتـه
إيه اللى خدتـه من مرور السـنين
يا قلبـى الا دمـعتك والأنـيـن
بتئن وبتفــرح وترجــع تحــن
مـع إن مـش كل البشر فرحـانين
عـجبى !!
أيـوب رمـاه الـبـين
أيـوب رمـاه الـبـين بـكـل الــعلل
سـبع سـنين مـرضان وعـنـده شـلل
الصـبر طيـب . . صـبر أيـوب شـفـاه
بـس الأكـاده مـات بـفـعل الـمـلل
عـجبى !!
بحـر الحياه
بحـر الحياه مليـان بـغرقـى الـحياه
صـرخت خش الـمـوج فى حلقى ملاه
قارب نجـاه ! . . صـرخت قالوا مفيش
غير بـس هو الـحب قـارب نـجـاه
عـجبى !!
بره القزاز
بره القزاز كـان غيـم وأمطـار وبـرق
مـا يهمنيش – أنا قلت – ولا عنـدى فـرق
غيرت رأيــى بعــد ســاعة زمـان
وكنت فـى الشـارع … وفـى الجزمة خرق
عـجبى !!
البـط شـال
البـط شـال عـدى الجبال والبحـور
ياما نفسـى اهـج … أحج ويا الطيـور
أوصـيك يا ربى لمـا امـوت … والنبى
مـا تودنـيش الجنـة … للجنـة سـور
عـجبى !!
بلياتشـو
بلياتشـو قال إيـه بس فايدة فنونى ؟
وتلات وقق مسـاحـيق بيلـونـونى
والطـبل والزمـامـير وكتر الجـعير
إذا كان جنون زبونى زاد عن جنونى
عـجبى !!
بين موت وموت
بين موت وموت . . بين النـيران والنيران
ع الحبـل ماشـيين الشـجاع والجبـان
عجبى علادى حيـاة . . ويـا للعــجب
إزاى أنـا – يـاتخين – بقيت بهـلوان
عـجبى !!
تسـلم يا غصن الخـوخ
تسـلم يا غصن الخـوخ يا عود الحطب
ييجـى الـربيع . . تطـلع زهورك عجب
وانا ليـه بيمضـى ربيع وييجـى ربيـع
ولسـه برضــك قلبـى حتـة خشـب
عـجبى !!
جــالك أوان وعـرفت
جــالك أوان وعـرفت مشـى الجنـايـز
كـيف شــفتهـا يـا عبـد رب اللـذايذ
قال : شـفت شـيل بالـحيل فـقير أو أمير
كمـا شـالـوا فـى الـخمامير فواضى القزايز
عـجبى !!
جـالك أوان
جـالك أوان ووقفت مـوقف وجــود
يا تجـود بـده يا قلبى يا بده تجـود
مـا حـد يقـدر يبقـى على كل شىء
مـع إن ـ عجبى ـ كـل شىء موجود
عـجبى !!
حاسب من الأحـزان
حاسب من الأحـزان وحاسـب لهـا
حاسب علـى رقابيـك مـن حبلهـا
راح تنتهـى ولابــد راح تنتهـى
مـش انتهت أحـزان مـن قبلهـا ؟
عـجبى !!
حبيـت
حبيـت . . لـكن حب من غير حنـان
وصـاحبت لـكن صـحبه مـا لهاش أمان
رحت لحــكيم واكـتر لقيت بـلوتـى
إن اللى جـوه القـلب مش ع اللسـان
عـجبى !!
حتـة محـارة
حتـة محـارة وجـدتها فى يوم لقيـة
قـالت لى شـوف كيف الطبيعة شقية ؟
نظـرت للكـهف اللـى فيهـا ولـقيت
إن الطـبيعـة كـمـان … لا أخـلاقية
عـجبى !!
حـدوته عن جعـران
حـدوته عن جعـران وعـن خنفسـه
اتقابلـوا حبـوا بعض سـاعة مسـا
ولا قال لهـم حـد اختشوا عيب حرام
ولا حـد قـال دى عـلاقـة متدنسـه
عـجبى !!
حقـرا وفـوق كوكـب حقـير
حقـرا وفـوق كوكـب حقـير محـتقر
فـى الكـون تكـون دنياكـو إيه يا بقـر
رملايـه من صـحرا؟ .. لكين إيش تقول
والكـون بحالـه جــوه عقـل البشـر
عـجبى !!
الحلـو يـم اليـم
الحلـو يـم اليـم صـابح رايـح
سـارح فى حضن الميه سابح سايح
الحلـو داب فى البحـر . . قلت أدوقه
وجـدت لسـه البحـر برضك مـالح
عـجبى !!
خـرج ابن
آدم م العدم
خـرج ابن
آدم م العدم قلـت : يـاه
رجـع ابن
آدم للعـدم قلت : يـاه
تـراب بيحيـا . . وحى بيصـير تراب
الأصـل هـو المـوت والا الحيـاة ؟
عـجبى !!
خـوض معركتهـا
خـوض معركتهـا زى جـدك مـا خاض
صــالب وقـالب شـفتك بامتعـاض
هـى كـده . . ما تنولش منهـا الأمـل
غير بعـد صـد ورد ووجـاع مخـاض
عـجبى !!
دخـل الـربيع
دخـل الـربيع يضـحـك لقـانى حـزين
نـده الربيـع على إسـمى لم قلت مـين
حـط الـربيع أزهـاره جـنبـى وراح
وإيش تـعمـل الأزهـار للمـيـتـيـن
عـجبى !!
دخل الشـتا
دخل الشـتا وقفـل البيبان ع البيوت
وجعـل شـعاع الشـمس خيط عنكبوت
وحـاجـات كتير بتمـوت فى ليل الشتا
لـكـن حـاجات أكتر بترفض تمـوت
عـجبى !!
الـدنـيـا أوده كـبـيره
الـدنـيـا أوده كـبـيره لـلانـتـظار
فـيهـا ابـن آدم زيـه زى الـحمـار
الـهـم واحد . . والمـلل مـشـترك
ومـفـيش حـمـار بيـحاول الإنتـحار
عـجبى !!
الدنيـا صندوق
الدنيـا صندوق دنيـا . دور بعـد دور
الدكـة هـى . وهـى كــل الديـكور
يمشـى اللى شـاف . ويسيب لغيره مكان
كـان عربـجــى أو كـان امبـراطـور
عـجبى !!
الدنيا من غير الربيـع
الدنيا من غير الربيـع ميته
ورقة شجـر ضعفانـه مفتفتـه
ـ لأ يا جدع غلطان تأمل وشوف
زهر الشـتا طـالع فى عز الشـتا
عـجبى !!
دى مـذكرات
. . دى مـذكرات وكـتبتهـا من سـنين
فى نـوتـه زرقـا لون بحـور الحنين
عترت فيهـا . . رميتهـا فى المهمـلات
وقلت أمـا صـحيح كـلام مـخبولـين
عـجبى !!
رقاصـة خرسـا
رقاصـة خرسـا ورقصه من غير نغم
دنيـا . . يا مين يصـالحها قبل النـدم
سـاعتن تهز بوجـههـا يعنـى لا
يترجـرجـوا نهـديهـا يعنـى نعـم
عـجبى !!
رقـبـة قـزازه
رقـبـة قـزازه وقلــبى فيهـا انـحشـر
شـربت كـاس واتنين وخـامـس عشـر
صـاحبت ناس م الخمرة ترجع وحـوش
وصـاحبت نـاس م الخمـرة ترجـع بشر
عـجبى !!
زحـام وأبـواق
زحـام وأبـواق ســيارات مزعجـة
إللى يطـول له رصـيف . . يبقـى نجا
لـو كـنت جـنبى يـا حـبيبى أنـا
مش كـنت اشـوف إن الحياة مبهجه ؟
عـجبى !!
سـرداب فى مسـتشـفى الـولاده
سـرداب فى مسـتشـفى الـولاده طـويـل
صـرخات عـذاب ورا كـل بـاب وعـويل
. . وفى الـطريق مـتزوقـين الـبنـات
مـتـزوقـيـن لـلحـب والـمـواويـل
عـجبى !!
سلام سلام
سلام سلام . . سلام سلام .. سلام
كلام كلام . . كلام كلام . . كلام
هز الـورق يا صـاحبى كدهوه
يطـلع كلام سلام . وسلام كلام
عـجبى !!
السـم لو كان فى الدواء
السـم لو كان فى الدواء . . منين يضر ؟
والمـوت . . ولـو لعـدونا . . منين يسـر ؟
حط القـلم فى الحبـر واكـتب كـمـان
. . والعبـد للشـهوات . . منين هـو حـر ؟
عـجبى !!
سـمعت نقطـة ميـه
سـمعت نقطـة ميـه جـوه المحـيط
بتقول لنقطـة مـاتنزلـيش فى الغويـط
أخـاف عـليكى م الغـرق . . قلت انا
ده اللى يخـاف م الوعـد يبقى عبيط
عـجبى !!
سـنوات وفايته
سـنوات وفايته عليـا فـوج بعـد فـوج
واحـدة خـدتنى إبـن والتـانية زوج
والتـالتـة أب خـدتنى والـرابعة إيـه
إيه يعمـل إللى بيحدفـه مـوج لمـوج ؟
عـجبى !!
سهيـر ليـالى
سهيـر ليـالى ويـامـا لفيـت وطفـت
وف ليلـه راجـع فى الضـلام قمـت شفت
الخـوف . . كأنـه كلـب سـد الطريق
وكـنـت عـاوز أقتـله . . بس خفـت
عـجبى !!
شــاف الطبيب جـرحـى
شــاف الطبيب جـرحـى وصـف له الأمـل
وعطـانـى مـنـه مقـام يـا دوب ما اندمـل
مجـروح جـديد يا طبيب وجـرحى لهـيب
ودواك فـرغ مـنى . . وإيــه العمـل ؟
عـجبى !!
صـوتك يا بنت الإيـه
صـوتك يا بنت الإيـه كأنـه بــدن
يرقـص يزيـح الهـم يمـحى الشـجن
يا حـلوتـى وبـدنك كأنـه كــلام
كـلام فلاسـفه سـكروا نسيوا الـزمن
عـجبى !!
الضـحك قـال
الضـحك قـال يا سـم ع التكشـير
أمشـير وطـوبة وانا ربيعـى بشـير
مطـرح ما باظـهر بانتصر ع العدم
انشالله أكـون رسـمايـة بالطـباشـير
عـجبى !!
ضـريـح رخـام
ضـريـح رخـام فيـه السعيـد انـدفن
وحفـره فيهـا شريـد من غـير كفـن
مـريت عليهـم . . قلـت يـا للعجـب
لاتنين ريحتهـم فيهـا نفـس العفـن
عـجبى !!
طـال انـتظـارى
طـال انـتظـارى للـربيـع يـرجـع
والجـو يـدفـا والـزهـور تـطـلع
عـاد الـربيـع عـارم عـرمرم شباب
إيه اللى خـلانـى ابتـديت افـزع ؟
عـجبى !!
ع الجسـر
ع الجسـر فت الصبح تحت الضباب
بين اللى لسـه بينغـرس واللى طاب
مـا اهتز قلبـى لنبـت طـالع جديد
قد اللى مـاشى . وتحت باطه الكتاب
عـجبى !!
عـاد الـربيع
عـاد الـربيع كـأنـه طعـم الحـب
والحـب نـار جـوه العـروق بتصب
اتمتـع ازاى بيـه وانـا متقـطـع
من كتـر خـوفى لا فى الخطيئة يطب ؟
عـجبى !!
عبثاً باقـول
عبثاً باقـول واقـرا فى سـورة عـبس
مـاتلومش حــد إن ابتسـم أو عـبس
فيه نـاس تقـول الهـزل يطـلع جـد
ونـاس تقــول الجـد يطـلع عـبث
عـجبى !!
عجبى عليـك
عجبى عليـك . . عجبى عليـك يا زمن
يـا بو البدع يا مبــكى عينى دماً
إزاى أنـا أختـار لـروحى طـريـق
وانا اللى داخـل فى الحيـاة مرغمـاً
عـجبى !!
عجبى علـى العجـب
عجبى علـى العجـب العـجيب العـجاب
لـمـا الحـقيقة تطـل بعـد احـتجـاب
وتـروق وتحـلا وفـجـأة تصبـح مفيش
كمثل طـراطـيش بحـر يـاما خد وجاب
عـجبى !!
العشــب طـاطـا للنســايم
العشــب طـاطـا للنســايم ونــخ
أخضـر طـرى مالهش فى الحسـن أخ
عصـفور عبيـط أنا . . غاوى بهجـة وغنا
ح انـزل هنـا . . وانشـا لله هبرنى فخ
عـجبى !!
علقـت فى المسـمار
علقـت فى المسـمار قناع مـهزلة
ومعـاه قنـاع مأسـاة بحزنه ابتلا
بصـيت لقيتهـم يشـبهوا بعضـهم
واهو ده العجب ياولاد . وإلا فـلا
عـجبى !!
علـم اللوع
علـم اللوع اضخـم كتاب فى الأرض
بس اللى يغلـط فيـه يجيبـه الأرض
أمـا الصــراحة فأمـرهـا ســاهل
لكن لا تجـلب مـال ولا تصون عرض
عـجبى !!
على بعـد مليـون ميـل
على بعـد مليـون ميـل من أرضـنا
من الفـراغ الـكـونى بصـيت أنـا
لا شـفت فـرق مـا بين جبال أو بحور
ولا شـفت فـرق ما بين عـذاب أو هنا
عـجبى !!
على رجلى دم
على رجلى دم . . نظـرت له مـا احتملـت
على إيـدى دم . . سـألت : ليـه ؟ لم وصلت
علـى كتفـى دم وحتـى علـى راسـى دم
أنـا كـلى دم . . قتـلت ؟ . . والا اتقتلت ؟
عـجبى !!
عيـد
عيـد . والعيال اتنططـوا ع القبـور
لعبـوا اسـتغماية . ولعبـوا بـابـور
وباللـونـات . ونـايلونـات شـفتشى
والحزن ح يروح فين جنب السـرور
عـجبى !!
عينى رأت مخلـوق
عينى رأت مخلـوق فى غاية البشـاعة
أنا قلت لـه لـمـا تأملتـه سـاعة :
اللــذة والمـوت علمــوك اللــزج
وانا علمـونى الفلســفة والشــجاعة
عـجبى !!
عينـى رأت مولـود
عينـى رأت مولـود على كتف أمـه
يصـرخ تهنن فيه يصـرخ تضـمه
يصـرخ تقـول يا بنى ما تنطق كلام
ده اللـى ما يتكلـمش يـا كتر همـه
عـجبى !!
غـدر الـزمان
غـدر الـزمان يـا قلبى مـا لهـوش أمـان
وحـاييجى يـوم تحتـاج لحبـة إيمـان
قلبى ارتجف وسـألنى . . أأمن بإيـه ؟
أأمـن بـإيـه محتـار بقـالى زمــان
عـجبى !!
غمسـت سـنك فى السـواد
غمسـت سـنك فى السـواد يـا قلـم
علشـان ما تكتب شـعر يقطـر ألـم
مالك جـرالك إيـه يا مجنون … وليه
رسـمت وردة وبـيت وقلـب وعلـم
عـجبى !!
غمض عينيك
غمض عينيك وارقص بخفـة ودلـع
الدنيـا هى الشابـة وانت الجــدع
تشـوف رشـاقة خطــوتك تعبـدك
لكـن انت لو بصيت لرجليك . . تقع
عـجبى !!
غسل المسيح قدمـك
غسـل المسـيح قدمـك يـا حافى القدم
طـوبى لمـن كانــوا عشـانك خـدم
صـنعت لك نــعليك أنـا يـا أخـى
مسـتنى إيـه . . ما تقوم تدوس العـدم
عـجبى !!
غطـس وقب المـوج
غطـس وقب المـوج نهـود بمبى
من ألف جيل جمـالات ماتعلم بى
يا قلبى عيب دول أمهـاتنا القـدام
اسـتغفر الله العـظـيم ربـى
عـجبى !!
فى يـوم صـحيت شاعر
فى يـوم صـحيت شاعر براحة وصفا
الـهـم زال والـحـزن راح واخـتـفى
خـدنى العـجب وسـألـت روحى سـؤال
أنـا مت ؟ . . والا وصـلت للفلسـفه ؟
عـجبى !!
الفيـلسـوف
الفيـلسـوف قـاعد يفـكر سـيبوه
لا تعمـلوه سـلطان ولا تصـلبـوه
مـا تعـرفـوش إن الفلاسـفة يا هوه
اللى يقـولـوه بيـرجعوا يـكـدبوه ؟
عـجبى !!
فتحـت شــباكى
فتحـت شــباكى لشـمس الصـباح
مـا دخلش منـه غير عويل الريـاح
وفتحـت قلبـى عشـان أبوح بـالألم
ما خرجش منه غير محبـه وسـماح
عـجبى !!
فـوق تحت
فـوق تحت . ورا قـدام . يمـين شـمال
فـى الجـو . تحت الميـة أو فى الرمال
طـلب الكمــال يحـرم علـى الممـكن
والممـكنات دول محـرومين م الـكمـال
عـجبى !!
فـارس وحيـد
فـارس وحيـد جـوه الـدروع الحـديد
رفرف عليه عصـفور وقـال له نشـيد
منين منين . . ولـفين لفين يـا جـدع
قـال من بعيـد ولسـه رايـح بعيـد
عـجبى !!
قـالـوا
قـالـوا الشـقيق بيـمص دم الشــقيق
والنـاس مـا هيـاش نـاس بحـق وحقيق
قـلـبى رمـيتـه وجبت غيـره حـجـر
داب الحجـر . . . ورجعت قلـبى رقيق
عـجبى !!
قلبـى عليل يا ناس
قلبـى عليل يا ناس وفى الكـاس دواه
مـديت له إيـدى شـربت م اللى حـواه
جنبى الشـمال خف . . اليمين اتـوجـع
وإيـه يـداوى الــكبد م اللـى كـواه
عـجبى !!
قـاعدة قنانـى الخمـر
قـاعدة قنانـى الخمـر سـاكتة وساهية
مـع ابن آدم فى الشـبه متنـاهيـة
مفيش كده روقان فى لـحظة تشـوفهم
وبـعدهـا بلحظـة يـودوا ف داهيـة
عـجبى !!
قطـى العـزيز
قطـى العـزيز راقد عـلى الكنبــات
فـى نـوم لذيـذ . . وبيلحس الشـنبات
وانا كـل عين فنجـان مدلـدق قلـق
صـدق اللـى قال إن الحياة منـابات
عـجبى !!
قالوا السياسة مهلكـة
قالوا السياسـة مهلكــة بشــكل عـام
وبحورهـا خشنة مش ريش نعـام
غوص فيهـا تـلقى الغرقـانين كـلهـم
شـيلين غنايـم . والخـفيف اللـى عام
عـجبى !!
قالوا ابن آدم روح
قالـوا ابـن آدم روح وبـدنـه كـفن
قالوا لأ بدن . قالوا لأ ده روح فى بـدن
رفـرف فـؤادى مـع الرايـات فى الهوا
أنـا قلت لأ روح فى بدن فـى وطـن
عـجبى !!
كان فيه زمـان سحلية
كان فيه زمـان سحلية طـول فرسـخين
كهفين عيـونهـا وخشمهـا بـربخـيـن
ماتت . . لـكين الرعب لم عمـره مــات
مـع إنه فـات بدل التـاريـخ تاريخـين
عـجبى !!
كل اللى فى الخمـارة
كل اللى فى الخمـارة صـابهم جنـون
صـبحوا الرجـال يتبـادلوا كاس المنـون
وبــدم ونبيـت انـكتب ع الجــدار
"يا ميت ندامة ع اللى قلبـه حنـون"
عـجبى !!
كروان جـريح
كروان جـريح مضـروب شعـاع م القـمر
ســقط مـن السـموات فـؤاده انـكسـر
جـريت عليـه قطـه عشــان تـبلعـه
أتـاريـه خيـال شـعراء ومـالهوش أثـر
عـجبى !!
كيف شـفت قلبـى
كيف شـفت قلبـى والنبـى يا طـبيب
هـمـد ومـات والا سـامع لـه دبـيب
قـاللـى لقيتــه مــختنق بـالدمـوع
وما لوش دوا غير لمسـه من إيد حبيب
عـجبى !!
كـان فيه قمـر
كـان فيه قمـر كأنـه فـرخ الحـمـام
علـى صـغيره دق شـعاع شـق الغمـام
أنـا كنت حـاضـر قلت لـه ينصـرك
إشـحال لمــا ح تبقـى بـدر التمـام
عـجبى !!
كربـاج سـعاده
كربـاج سـعاده وقلبـى منـه انجلـد
رمـح كأنــه حصـان ولف البلــد
ورجـع لى نص الليـل وسألنى . . ليه
خـجلان تقـول انـك سـعيد يا ولـد
عـجبى !!
كام اشـتغلت يا نيـل
كام اشـتغلت يا نيـل فى نحت الصـخور
مليـون بئونـه وألـف مليـون هـاتـور
يا نيل أنا ابــن حـلال ومـن خـلفتك
وليـه صـعيبـه عـلى بـس الأمــور
عـجبى !!
لـيـه يا حبيبتى
لـيـه يا حبيبتى مـا بيننـا دايمـاً سـفر
ده البعـد ذنـب كـبـير لا يـغـتـفر
ليـه يـا حبيبتى مـا بيننـا دايمـاً بـحور
أعدى بـحـر ألاقـى غيـره اتـحـفـر
عـجبى !!
لو فيه سـلام
لو فيه سـلام فى الأرض وطـمان وأمـن
لو كان مفيش ولا فقـر ولا خـوف وجبن
لو يمـلك الانسـان مصـير كـل شـىء
انا كنت أجيب للدنيـا مـيت ألـف إبـن
عـجبى !!
لا تجبر الإنسان
لا تجبـر الإنسـان ولا تخـيره
يكفيه ما فيه مـن عقـل بيحيـره
اللـى النهـارده بيطلبه ويشـتهيه
هو اللى بكـره ح يشـتهى يغيره
عـجبى !!
لولا اختـلاف الرأى
لولا اختـلاف الرأى يا مـحترم
لولا الزلطـتين ما لوقـود انضـرم
ولولا فـرعين ليف سـوا مخـاليف
كان بيننـا حبل الود كيف اتبـرم ؟
عـجبى !!
مـع إن كـل الخلق
مـع إن كـل الخلق مـن أصـل طين
وكلهـــم بينزلــوا مغمضــين
بعـد الــدقايق والشــهور والســنين
تــلاقى ناس أشـرار وناس طيــبين
عـجبى !!
مرغم عليـك يا صـبح
مرغم عليـك يا صـبح مغصوب يا ليل
لادخلتهـا بـرجليا ولا كــانـلى ميل
شـايلنى شـيل دخلـت انا فى الحياة
وبكـره ح اخرج منهـا شـايلنى شـيل
عـجبى !!
مهبـوش بخـربـوش
مهبـوش بخـربـوش الألـم والضـياع
قـلـبى ومـنـزوع م الضـلوع انتـزاع
يا مرايتى يـا اللى بترسـمى ضـحكتى
يـا هلتـــرى ده وش والا قـنـاع
عـجبى !!
مـا حد فى الدنيـا
مـا حد فى الدنيـا دى واخد جـزاته
ولا حـد بيفكـر فى غير لـذاذاتـه
مـاتعرفيش يا حبيبتى . . أنا وانتى مين ؟
إنتـى عـروس النيل . . وانا النيل بذاته
عـجبى !!
من بين شـقوق الشـيش
من بين شـقوق الشـيش وشقشقت لـك
مع شـهقة العصـافير وزقـزقت لـك
نهـار جـديد انا . . قوم نشـوف نعمليه
انا قلت يا ح تقتلنـى . . يا ح اقتـلك
عـجبى !!
مزيكـه هـاديـه
مزيكـه هـاديـه الكـون فيهـا انغمـر
وصـيف وليـل وعقـد فـل وســمر
يـا هلترى النـاس كلهـم مبسـوطـين
ويـا هلترى شـايفين جمـال القمـر ؟
عـجبى !!
مرحب ربيـع
مرحب ربيـع مرحب ربيـع مرحبـه
يـا طفل يا للى ف دمى ناغا وحبـا
علشـان عيونـك يـا صـغنن هـويت
حتـى ديــدان الأرض والأغـربــه
عـجبى !!
مـنين أجـيبهـا
مـنين أجـيبهـا كلمــه متألمــة
لعبيـة فايـره حايـره ومصـممــة
منين أجيب كلمـة تكـون بـنت أرض
تشـفى اللـى ما شـفاهوش كلام السـما
عـجبى !!
المـوج تلـول تهـبط
المـوج تلـول تهـبط وتطـلع تلـول
يـا بحـر خـدنى الشـط صاحبك ملول
والا بـلاش الشـط ح اعمـل به ايـه
ده ريحتـه طـحلب مهرى وام الخلـول
عـجبى !!
ما انتاش بتلعب ليـه
ما انتاش بتلعب ليـه يا روح بـابـا ؟
ولا عسـكرى ولا لص فى عصـابة ؟
إلعب أسـد أو ديب رهيب أو غـزال
دى الدنيـا فى نهاية المطـاف غابـة
عـجبى !!
مـركب ورق
مـركب ورق مـن نفخـة تتطـوح
ركـبتهــا والـكــل بيـلــوح
سـوحت فيهـا اتنين وخمسـين سنه
للآن . ولا بتغــرق ولا تـروح
عـجبى !!
نظـرت فى الملـكوت
نظـرت فى الملـكوت كتيـر وانشـغلت
وبكل كلمـة (ليه ؟) و(عشانيه) سـألت
اسـأل سـؤال . . الرد يرجـع ســؤال
واخـرج وحيـرتى أشـد ممـا دخلـت
عـجبى !!
نـوح راح لحـالـه
نـوح راح لحـالـه والطـوفـان اسـتمر
مـركبنـا تايهـة لسـه مش لاقيـة بـر
آه م الطـوفـان وآهيـن يـا بـر الأمـان
إزاى تبـان والـدنـيـا غـرقـانـة شـر
عـجبى !!
نـظرت فـوقى للنـجـوم
نـظرت فـوقى للنـجـوم وانـا سـايـر
رجليـا عتـرت فى الحفـر والحجـايـر
بـقيـت أقـول وانا ع التراب : يـا سـلام
مـش بـس عـبره أخـذت لـكن عبـاير
عـجبى !!
النهـد زى الفهـد
النهـد زى الفهـد نـط انـدلـع
قلبـى انهبش بين الضلوع وانخلع
يـاللـى نهيت البنت عن فعلهـا
قـول للطـبيعـة كمـان تبطل دلع
عـجبى !!
نقطـة مرارة
نقطـة مرارة كمـان على مشـروبى
دوبهـا يا سـاقى حسـب مطـلوبى
طـعم الحياة . مش برضه فيها وفيها ؟
ليـالى وردى ونهـارات خـروبى ؟
عـجبى !!
هـات يا زمـان
هـات يا زمـان . وهـات كمان يا زمان
غير بسـمة الشــجعان مـامنـى يبـان
هـو اللـى داق الفـرحـة يـوم ثورتـه
يـقـدر يعــود ولا ثانيـة للأحـزان ؟
عـجبى !!
وانا فى الضـلام
وانا فى الضـلام . . من غير شـعاع يهتكه
أقـف مـكـانى بخـوف ولا أتـركـه
ولمـا ييجى النـور واشـوف الـدروب
أحـــتــار زيـادة . . أيهـم أسـلكــه ؟
عـجبى !!
والـكون ده كيف موجود
والـكون ده كيف موجود من غير حـدود
وفـيـه عقـارب ليـه وتعـابين ودود
عـالـم مجـرب فـات وقـال سلامـات
ده ياما فيـه سـؤالات من غير ردود
عـجبى !!
ورا كـل شـباك ألـف عين
ورا كـل شـباك ألـف عين مفتـوحين
وانا وانـتى مـاشـيين يا غـرامى الحزين
لـو التصـقنا نمـوت بضـربة حجـر
ولـو افتـرقنـا نمــوت متـحسـرين
عـجبى !!
وقـفـت بـيـن شـطيـن
وقـفـت بـيـن شـطيـن على قـنـطرة
الـكـدب فين والصـدق فين يـا تـرى
محتار ح اموت . . الحـوت خرج لى وقال
هـو الـكــلام يتقـاس بـالمســطرة ؟
عـجبى !!
ولدى نصـحتك
ولدى نصـحتك لمـا صـوتى اتنبــح
ما تخـافش من جـنى ولا من شبـح
وان هـب فيـك عفـريت قتيـل إسـألـه
ما دافعش ليه عن نفسـه يـوم ما اندبح ؟
عـجبى !!
ولدى
ولدى إليك بدل البالـون مـيت بالـون
انفـخ وطـرقع فيه علـى كـل لـون
عسـاك تشـوف بعنيـك مصـير الرجال
المنفـوخين فى السـترة والبنطلــون
عـجبى !!
ولـو انضـنيت وفنيت
ولـو انضـنيت وفنيت وعمـرى انفـرط
مش عـاوز الـجـأ للحـلول الوسـط
وكـمـان شـطط وجنـون مـانيش عاوز
يـامين يقـول لى الصـح فين والغـلط ؟
عـجبى !!
وقفت سـاعة الصـبح
وقفت سـاعة الصـبح باغسـل سـنانى
قالت لى شـايف قـوتى ولـمعـانـى ؟
إيش تطلب اليـوم مـنى ضحكـة أسد ؟
والا ابتسـامة اعـلانات أمـريكـانى ؟
عـجبى !!
ورد ف ورق سـلوفان
ورد ف ورق سـلوفان يا حـلوة اهديلك ؟
والا انقله بالطـين فـى شـتلة واجيلك ؟
الأولانــى لــو وحــا بحـنانـى
عجبى علـى التـانـى بـإيـه يـوحـيلك
عـجبى !!
وسـط الحطـام
وسـط الحطـام اتفرجـوا يا أنـام
تمثـال مـلك . ومبولـة م الرخام
لتنين نحـتهـم نفس أسـطى الحجر
وكانـوا ذات يـوم كتلتين لسـه خام
عـجبى !!
ياما صـادفت صـحاب
ياما صـادفت صـحاب وما صحبتهمش
وكاسـات خمـور وشراب ومـا شربتهمش
أنـدم على الفـرص الـلى انـا سبتهـم
والا على الفـرص اللى مـا سـبتهمش
عـجبى !!
يا باب أيا مقفـول
يا باب أيا مقفـول . . إمـتى الدخـول
صـبـرت يـامـا واللى يصـبر ينـول
دقيت سـنين . . والرد يرجع لى : مين ؟
لو كنت عارف مين أنـا . . كنت أقـول
عـجبى !!
يوم قلت آه
يوم قلت آه . . سـمعونى قـالوا فسـد
ده كان جـدع قلبـه حـديـد واتحسـد
رديت على الـلايمين أنا وقلت . . آه
لـو تعـرفـوا معـنى زئـيـر الأسـد
عـجبى !!
ينـبوع
ينـبوع وفـى الحـواديت أنا سـمعت عنه
إنه عجيب . . وف وسط لهـاليب لكنـه
شـقيت كمـا الـفرسـان طـريقى . . لقيت
حـتى الخـنازيـر والكـلاب شـربوا منـه
عـجبى !!
يـا قـرص شـمـس
يـا قـرص شـمـس مـا لهش قبة سـما
يـا ورد مـن غـير أرض شـب ونـمـا
يـا أى مـعنى جـميل سـمعنا عـليـه
الخـلق لـيـه عـايشـين حـيـاه مؤلمـة
عـجبى !!
يا حـزين يا قمقـم
يا حـزين يا قمقـم تحت بحـر الضياع
حـزين أنـا زيـك وإيـه مسـتطـاع
الحـزن مـا بقالهـوش جـلال يا جـدع
الحـزن زى البـرد . . زى الصـداع
عـجبى !!
يـا نـجم
يـا نـجم . . نـورك ليه كده بيرتجــف ؟
هــو انت قنـديل زيت ؟ . . أو تخـتلف ؟
ـ أنـــــا نـجـم عـالى . . بس عالى قوى
وكـــل مـا انــظر تحت اخـاف انحـدف
عـجبى !!
يا طير يا عالى
يا طير يا عالى فى السـما طظ فيـك
مـا تفتـكـرشـى ربنـا مصـطفيـك
بـرضـك بتـاكل دود وللطيـن تـعود
تمص فيـه يـا حـلو . . ويمص فيك
عـجبى !!
ياللى نصـحت الناس
ياللى نصـحت الناس بشــرب النبيت
مع بنت حلوه . . وعود، وضحك، وحديت
مـش كنت تنصـحهم منين يكسـبوا
تمن ده كـله ؟ . . والا يمـكن نسـيت
عـجبى !!
يا للـى انت بيتك قش
يا للى انت بيتك قش مـفروش بريش
تقـوى عليه الـريح . يصـبح مفيش
عجبى عليك حـواليك مـخالب كـبار
وما لكش غير منقـار وقـادر تعيش
عـجبى !!
يـاللى عـرفت الحـب
يـاللى عـرفت الحـب يـوم وانطوى
حسـك تقـول مشـتاق لنبـع الهـوى
حسـك تقـول مشـتاق لنبـع الغـرام
ده الحب . . مين داق منه قطره .. ارتوى
عـجبى !!
يـا ميت نـدامـه
يـا ميت نـدامـه ع القلـوب الخــلا
لا مـحبـة فيـهـا ولا كـراهـه ولا
حتى يـا قلبـى الحـزن ما عادش فيـك
معلـهش … لك يـوم برضـه راح تتملا
عـجبى !!
يأسـك وصـبرك
يأسـك وصـبرك بين إيديك وانت حـر
تيأس مـا تيـأس الحياه راح تمــر
أنا دقت مندا ومندا عـجبـى لـقيت
الصـبر مـر وبرضـك اليـأس مــر
عـجبى !!
يا عنـدليب
يا عنـدليب ما تخـافش من غنـوتك
قول شـكوتك واحكـى علـى بـلوتك
الغنـوه مـش ح تمـوتـك إنـمـا
كتـم الغنـا هو اللـى ح يمـوتـك
عـجبى !!
ياللـى بتبحـث عـن إلـه
ياللـى بتبحـث عـن إلـه تعبـده
بحـث الغـريق عن أى شىء ينجده
الله جميـل وعليـم ورحمـن رحيـم
إحمـل صـفاته … وانت راح توجده
عـجبى !!
يا للى ف حمـاه الشـمس
يا للى ف حمـاه الشـمس تلقـى المـلاذ
وألـف بـكره وبـكره … فى ضلوعه لاذ
مين انت؟ مـارد؟ رب؟ قـال لأ ده بس
يا اللى بـاروى القمـح واسـقى الفـولاذ
عـجبى !!
يـا كـل كلمـة
يـا كـل كلمـة للعجب فى قامـوس
انسـكلوبيديا لسـان عرب أو لاروس
تعـالـوا نجـدة . ده لسـه فى عصرنا
الشـمـس والبحـر العريـض بالفلـوس
عـجبى !!
يا وردة قلبى
يا وردة قلبى معـاكى فى الريـح لعب
لا تعبتى م الريـح ولا قلبى تعـب
احنـا كده : نرتـاح فى صخب الجنون
وفى السـكون بنخـاف قوى ونترعـب
عـجبى !!
يا خـالق الكـون
يا خـالق الكـون بالحسـاب والجبر
وخـالقنى مـاشى بلختيـار والجـبر
كـل اللى حـيلتى زمـزميـة أمـل
وازاى تـكفينى لـبـاب القــبر ؟
عـجبى !!
يا مـلونين البيـض
يا مـلونين البيـض فى شـم النسـيم
لـون الحـنين والشـوق وخمر النديـم
مـاتعرفوش ســايق عليــكو النبـى
تلونـوا الأيــام بلــون النـعيـم ؟
عـجبى !!
يـومـى علـى الله
يـومـى علـى الله تنتهـى وتـغيب
الشـمس . وتعـود تانـى يوم لهاليب
زى الحياة . مأسـاه . ومن كتـرهـا
بقـى لا انتهاءهـا وابتداءهـا عجيب
الرئيسية
موضوع: الراحل الكبير صلاح جهين (ربعيات عم صلاح) 